25. 6. 2023: Понад 8 700 людей записало собі в Сербії материньскый язык русиньскый
Як інфрмує аґентура Рутенпрес, сербскый Републіковый штатістічный уряд опубліковав далшу серію резултатів Списованя жытелїв 2022. Публікованы были даны о материньскім языку, віковій штруктурї населїня і віроісповіданю.
За даныма, котры были публікованы, 8 725 особ собі в Сербії записало як материньскый язык русиньскый язык. Як сьме вже інформовали скорїше, у Републіцї Сербія в списованю у 2022-ім роцї приголосило ся ку Русинам 11 483 людей.
Русинька комуніта контінуално зменшує ся уж десяткы років. В списованю з 2011-го року іщі раховала 14 246 особ. В порівнаню з минулорочныма резултатами Русины стратили понад 19 процент населїня, 2 763 особ.
Сербскый язык як материньскый записало собі 5 607 558 обчанів, што є 84,4 процента населїня. З меншыновых языків найвеце здобыв мадяьскый язык, ку котрому як материньскому записало ся 170 875 людей, што представлює 2,6 процента. За ним слїдує босняньскый язык із 145 329 приголошеныма особами, ромскый, ку котрому голосить ся 79 687 людей, і албаньскый, котрый як материньскый записало собі 65 475 особ.
Што до віковой штруктуры, найвеце Русинів у Сербії є в катеґорії од 30 до 49 років. Другов найвекшов віковов ґрупов меджі Русинами є катеґорія од 65 до 84 років, а третьов катеґорія од 50 до 65 років. Дїтей до 14 років мають Русины 1 280, молодеж од 15 до 29 років рахує 1 567 особ.
Найвекшов реліґіёв у Сербії є православє, ку котрому голосить ся 5 758 719 особ, што представлює 81 процент. Далше в країнї приголосили ся католици, мусулманы, протестанты, але і членове жыдівской реліґійной громады. Атеісты творять лем 1,1 процента населїня, і як аґностік декларовало ся 0,1 процента жытелів.
Петро МЕДВІДЬ, ЛЕМ.фм, языкова і ґрафічна управа: АРК в СР.
